(( الجميلة و الوحش ))

فهد ولد خالتي..عمره أربع سنوات.. مررررة كيووت وحلو بسم الله عليه، بس مشكلته انه شقي و "شيطاني" إلى أبعد درجة ودايم يحب يطق عيال الناس.. في عائلتنا يسمونه "الوحش" لأن كل "البزران" يخافون منه.. مايخلي أحد في حاله.. حتى الأولاد اللي أكبر منه بسنة وسنتين وثلاث طقهم وصفقهم. أمس في الاستراحة صار موقف عجيب..وحنا جالسين نتعشى جونا البزران وهم يصارخون.. "فهد تضارب..فهد تضارب.." طبعا كلنا قمنا بسرعة عشان نفك المضاربة وننقذ "البزر الآخر" من "مخالب و أنياب" فهودي التي لاترحم.. بمجرد وصولنا إلى مكان المضاربة كانت المفاجأة!! كانت "دلع" بنت خالي..البنت الحلوة الدلوعة ذات الأربع سنوات هي اللي جالسة تضرب في "فهودي".. كانت تضرب بكل ما أوتيت من قوة.. والعجيب إن فهد ساكت مايسوي شي..يمكن لو ماوصلنا في ذيك اللحظة كان "دلع" ذبحت "فهودي" من الطق!!
الموقف هذا صار "سالفة السوالف" في الاستراحة.. الكل يتساءل وشلون فهد ينطق وينضرب؟!! ومين اللي يطقه؟؟ بنت!! فهد "الوحش" اللي محد قدر عليه يقف عاجزا مستسلما أمام "بنت".. مايصير ياعالم!!
في السيارة وفي طريق عودتنا من الاستراحة قالت لي أختي: "محمد.. شفت اللي صار اليوم.. مضاربة فهد و دلع.. شفت وش سوت دلع في فهد؟غريبة!!"
ابتسمت ابتسامة خفيفة ثم التفت لها وقلت:
"ليه مستغربة..لاغريبة ولاشي.. إنه الجمال الذي قتل الوحش"..